1Jo 2 | KZE | STEP | kesí iyámpóíyono. íma sáwíꞋa ónááontaveꞋa maanáímbá aúváívimba agaimái timúne. ánivo sáwíꞋo íyanamo éna siráváyáiwaiya ména kesivompátá áísaa íníye. kwemá Ísu Káráísitima arupí iwáíyá kesivompátá áísaa íníye.

1 John 2

1 kesí iyámpóíyono. íma sáwíꞋa ónááontaveꞋa maanáímbá aúváívimba agaimái timúne. ánivo sáwíꞋo íyanamo éna siráváyáiwaiya ména kesivompátá áísaa íníye. kwemá Ísu Káráísitima arupí iwáíyá kesivompátá áísaa íníye. 2 sáwítaamo uráunda-meyamba kentááváꞋá íma tíno séna maimaéna pukáiye. íma kentáásí sáwí-meyane suꞋmainivo amáparawaiti sáwí-meyankwaraꞋa maitiyuwáníntavena pukáiye.

3 Áánútun-aaimo taagwiyavétaamo únda áraiꞋa kweséya tarúmaiya máyaumneya kwésune. 4 Áánútun-aaimo ímo taagwiyávónkaꞋo ombá Áánútuwe tarúmai máyaumnemo sembá kampaꞋá sewaná miwívímbá Áánútuna árair-aimba íma kwáyáiye. 5 ánivo Áánútun-aaimo taagwiyávówai ÁánútumpaꞋa tirumbá ámaꞋmai kaweꞋá kwéowe. kesáámó Áánútuwe tarúmai máyaumnemo kwésundawaiya Ísu Káráísitimo máyontemba kesáá miráyá umáíya ménaumne. miráyáámó kwéunda áraiꞋa Áánútuwe tarúmaiya máyaumneya kwésune.

ááéraan-amaankoma aúnáiꞋa uráin-kwasai.

7 kesí kwaási ísáaro. kemó kwéagayaunda íma aúná-amaamban-ivo ááéraan-amaamba kwéagaimai timúne. aivaꞋá simátímakaamba áꞋa ísaraan-amaamba kwéagaimai timúne. 8 ánivo túnín-tantaaꞋa kwéauyokwisana áraiꞋa sámo kain-tántááꞋá kwévaarimba póna ááéraan-amaamba aúnáiꞋa umái kwévaariye. Ísu Káráísitina mayáívínkémbá minámáámbá paárurena keinárawapinkwaraꞋa minámáámbá kwévaariye.

9 kentí kwaásiyavai tíyámba kwéumatinkaambanivo sámo kain-áyámpáꞋá máyaumne sembá sámo kain-áyámpáꞋá íma máémba túnín-ayampaꞋa paaí máyáawe. 10 ánivo kentí kwaásimo tirumbó tíméwai sámo kain-áyámpáꞋá máyáamba pósa miwívímbá sáwí-yantaaꞋa íma kwáyáímba pósa óꞋowi tuwánésa sáwí-ampaꞋa íma kwégowe. 11 ánivo kentí kwaásiyavaimo tíyámbo kwéumatinkaawai miwí túnín-ayampaꞋa máyáawana túnín-tantaako túrampaꞋa káátagwisasa múguꞋmaaguꞋa úmaesa kwégowe.

12 kesí iyámpóíyono. keinárawatavena Ísu Káráísiti pukáimba póna Áánútu kentí sáwí-imayaa maitíyukaintaveꞋa kemá maanáúváí agaimái kwétimune. 13 anón-kwaasiyono. ááinkaꞋa maramá íma kwáyowana moóráwai maémáimba kwemá ívékwaraꞋa máyáísaꞋa kwená ááimba kwéisaantaveꞋa maanáúváí agaimái kwétimune. ívé-kwaasiyono. Sáátáánigomba usáyaaitaraantaveꞋa maanáúváí agaimái kwétimune. 14 iyámpóíyono. Áánútu kentivo isaꞋá kwempáꞋá tiráantaveꞋa maanáúváí agaimái kwétimune. anón-kwaasiyono. ááinkaꞋa moóráwai maémáimba kwemá ívékwaraꞋa máyáísaꞋa kwená ááimba kwéisaantaveꞋa maanáúváí agaimái kwétimune. ívé-kwaasiyono. asiramái méꞋa Áánútun-aai tirumpimbá tátoreꞋa Sáátáánigomba usáyaaitaraantaveꞋa maanáúváí agaimái kwétimune.

15 ÁánútumpaꞋo ímo tiráawaimo ontembá mindáyaveꞋa aamoí íma oró. marapákén-tántáátávéꞋa aamoí íma oró. marapákén-tántáátávésamo aamoimó owáímá Áánútuntavesa íma aamoí kwéowe. 16 marapákén-kwáásímó kwéowaina ááimba íma Áánútumpakemba kwéowe. kwaási kentí imáyáavinkemba kwéesa áꞋowiti náaindaamba túran-anda kwéesa túwíꞋa maimaésa kwéiyesa kwéomba íma Áánútumpakemba kwéovo marapákén-ámbá kwégwaraawe. 17 marapákén-tántááꞋó tirááímo kwétain-tantaaꞋa maambáráꞋá ánásainasa Áánútumba arááíma tainíꞋa kwéon-kwaasi aasiyaasí maíꞋmaiꞋa ónááowe.

Káráísitina namuro-kwáásítí kwaasái.

18 kesí iyámpóíyono. naaén-kanaa maramó ánásanin-kanaa sáwíyankaꞋa tíníye. naaémba Ísu Káráísitina namuro-kwáásígó tíníye suwaꞋá ísaraawe. Káráísitina namuro-kwáásí sáwívaꞋa áꞋa paáruraamba póta mindáyaveta naaén-kanaa sáwíyankaꞋa tíníye kwésune. 19 kentáávínkémbá Káráísitina namuro-kwáásí moórá-mora máyómba pósa usásimbai paárésa siyuwésaya kóuraawe. áraiꞋo kentáásí kwaásimo máyáankakai úwoi máésino. siyuwésaya kóuraantaveta íma kentáásí kwaásin-owe kwésune.

20 Ísu Káráísiti Áánútun-amankomba aiꞋmarówana kuména kentirumpimbá máyáísaꞋa póꞋa árair-aimba kwéisaawe. 21 árair-aimba íma kwéisaantavaiye séꞋa ímanivo árair-aimba kwéisaantaveꞋa maanáúváí kwéagayaumne. árair-aimpinkemba kampar-áímbá íma paárisaꞋa ísaraantaveꞋa maanáúváí agaimái timúne.

22 anón-kampaꞋo sen-kwáásí maarán-kwáásímán-owe. Ísu Káráísitintavesa Áánútu íma usásinankaraiwaiman-iye kwésen-kwaasi ésa Ísu Káráísitina namuro-kwáásí-íꞋa ésa Áánútunte ááninkonte tínaaemba kwéumatimewe. 23 Áánútu ááninkomba tínaaemba umámewai avowánkwáráꞋá mirá kwéombanivo Ísu Káráísitintavesa Áánútu ááninkoman-iye kwésewai ááninkonte avowántéyópaꞋa tarúmai máyáawe.

24 Ísun-aai aivaꞋá ísaraan-aimba tirumpimbá asiramái tátoraamba íma ivátuweꞋa miráumai Áánútunte ááninkonteyopaꞋa tarúmai maíꞋmaiꞋa oró. 25 maarán-áímbá Ísu Káráísiti asiramái simásimenaya séna aúnáiꞋa umái maíꞋmaiꞋa ónááoniꞋa kwéumatinkaumne simásímakaintaawe.

26 kampar-áímbá simátiyuwaavo séꞋa maanáúváí agaimái timúne. 27 kampar-áímbá simátiyuwaawai kwéombanivo Ísu Káráísiti Áánútun-amamba tirumpimbá tínkaraimba póna maíꞋmaiꞋa éna íma kampar-áímbá simátimena árair-aimba kwésimatimiye. mirámó kwésimatimisaꞋo ombá árair-aimba kampar-áímbá taaínkaaꞋa kwéowe. simátímíntemba mirá éꞋa Ísu Káráísitiye tarúmai kwémaewe.

28 kesí iyámpóíyono. kwesé tarúmai máyáamba póꞋa Ísu Káráísiti kumíndaraꞋa kwenaúrankaꞋa íma tigaeyávéꞋa éꞋa úwoi asiramái ménaaowe. 29 Ísu Káráísiti arupí umái máyáin-aimba áꞋa ísaraawe. moórá-ainkwaraꞋa ísáaro. miráumai arupí umái máyáawai áraiꞋa Áánútuna iyámpóíman-owe.